أوقات كتير بقعد معايا وأفكر وأسألنى :
هل ممكن آخد أجازة زى بقية الخلق؟
هل ممكن فى يوم أصحى الصبح أبص فى الساعة
ألاقينى بقوللى: نام نام إنت فى أجازة؟
وكتير بقعد أستغرب وأسألنى تانى:
ليه ليه أنا دخلت طب؟
هل فى ذنب عملته وأنا صغير
ربنا عاقبنى عليه ودخلنى طب؟
أم هل زعلت أمى وأنا صغير
قامت دعت عليه وقالت:
يارب تدخل طب؟
ولا يمكن غشيت فى إمتحان وأنا صغير؟
ولا ما غشيتش بس كنت من جوايا عايز أغش؟
ولا ماغشيتش ولا كنت من جوايا عايز أغش
بس كان فيه واحد جنب منى عايز يغش؟
ولا يمكن فى يوم عديت على حد من اللى بيشحتوا
فقمت بكل برود ماشى من غير ماديله حاجه؟
هو اللى أنا متأكد منه إن فى ذنب كبير أنا أو أى حد قريبى عمله
ولسة بتعاقب عليه لحد دلوقتى
أنا مش متضايق إن كل الناس خلصت إمتحانات والنتيجة ظهرت
وأنا لسة بقول ياهادى فى الإمتحانات
ومش متضايق أكتر إنى هفضل أمتحن لحد أخر رمضان
ومش متضايق خالص خالص إنى السنادى بدأت قبل رمضان
وهتخلص فى آخر رمضان(يعنى 13 شهر)
ومش متضايق من رؤساء الأقسام اللى نازلين طحن فينا
أنا متضايق من حاجة أكبى من كده
أنا متضايق أنى دخلت طب من أساسه
حد ياخد كليتى بعد خمس سنين إلا إمتحان
ويدينى بدالها مروحة..........طب بلاش مروحة
طب أنا هديله مروحتين هدية
يا ريتنى ما دخلت طب
14 comments:
يسعدنى اكون اول رد
اية يا دكتور انت تعبت ولا اية؟
لالالالا
عيب عليك خليك راجل كدة عشان نفرح بيك وتبقى دكتور اد الدنيا
وبعدين انت فديك الساعة لما مامتك تقعد تقول الدكتور راح الدكتور جه
الدكتور عمل الدكتور قال
هيبة يابنى وسط الناس
انا عن نفسى بافرح جدا لبابا وماما لما يقولوا ان بنتهم مهندسة
يعنى ممكن مش تقول عليها ذنب دة اولا قدر
ثانيا انت بترد شوية من جميل بابا وماما وبتقولهم افرحوا بيا تربيتكم جابت نتيجة حلوة اوى
بااااااااااااااااى يا دكتور
أشكرك يا باشمهندسة على الكلام الجميل ده
بس أعتقد إن بابا وماما مش ممكن يفرحوا بالعذاب اللى أنا فيه
أنا مشكلتى مش فى عدد السنين
أنا مشكلتى فى توقيت الإمتحانات
يكفى إنك تعرفى إنى هخلص إمتحانات بعد دخول الدراسة
حاقولك زي ما كان دكتور اسامة محمود كان بيقول
ايه الي دخلك كلية التب ياضانيا
المشوار لسه طويل حاول تتعايش معاه
واستمتع بكل لحظة ف حياتك
كل شيء بناخده ف الكلية فيه شيء لذيذ جدا و مغامرات مع العيانين وف العمليات والدكاترة
والله احنا ف نعمة كتير بيحسدنا عليها
عارف فكرة التعب الممتع
لما تستشعر ان كل معلومة بتقراها ممكن تنقذ بيها حياة انسان
وانت ممكن تفيد دينك وامتك اكيد شعورك حيتغير
جدد نيتك واستشعر النعمة الي انت فيها وف نفس الوقت ماتعقدش نفسك
اخرج واتفسح واعمل الي نفسك فيه
حس وانت رايح المستشفي كانك ف رحلة مش رايح غصبن عناك وربنا يوفقك يارب
انا ايميلي اهو لو عايز مني اي حاجة
pakauko@yahoo.com
أنا متشكر جدا يا دكتور أفغانى
على النصيحة الغالية دى
بس الطب المصرى أكيد مش اللى بتتكلم عنه
وزى ما الدكتور أسامة محمود بيقول
مش مهم العيان يموت بس المهم يموت متشخص
أنا هحاول أخد بنصحتك
ومن أول السنة اللى جاية
هقضيها رحلات لمستشفى الجامعة
كله بثوابه يا روميو ان شاء الله
هتكون دخلت طب ليه يعني اكيد دخلت عشان جبت مجموع في الثانوية العامة العقيمة بتاعة بلدنا وقولت تعمل بعقدة الخواجه بتاعة الشعب العربي بأكمله وتكون دكتور انشالله فالاخر تاخ600 جنية ولا لهم اي لازمة وتكون دكتور فالاخر زي منا كنت ممكن ادخل تجارة انجليزي وقولتلهم ادخل اداب تاريخ مع ان تجارة احسن بس انا كنت عايزة ادخل اثار ومجاليش غير اثار اقاليم
وانا بعتبر اللي بيكون زيك كده انسان معدوم الشخصية وماشي ورا العادات وخلاص مش حابب هو عايز يكون ايه ولا فكر فيوم وهو بيذاكر انا عايز اكون ايه هو حاسبها المهم اعلى سعر لكن انت لو كنت داخل كليتك دي من مبدأ انساني وانك تكون سعيد وانت شايف المريض ربنا بيشفيه على ايدك مكنش ده هيكون احساسك دلوقتي زي منا كان نفسي ابئى مرشدة سياحية وماكتفتش بدراستي وخدت عليها اكتر من شهاده وطلع عيني وتعبت ومكنتش بضايق وساعات كمان كنت بطلع من امتحان الكلية اروح الكورس ودلوقتي بكمل فكده وبئوم من بدري زي الشاطرة عشان انزل وامشي فالشمس واتنقع في الحر عشان اعرف الناس دي يعني ايه بلدنا وحضارتها واحببهم فيها مش اقعد اخنقهم منها واقرفهم في عشيتهم ومع ذلك بتعب جداً وده مع دراستي وبكون سعيدة
حاول تشوف حل انت كمان للحالة اللي انت فيها لحسن توصل لمرحلة انك تموت الناس من كتر منانت مخنوق وتعبان من شغلك عشان هتكون دي مشكلة انت دكتور وحالف قسم
اصل انا خلاني دكاترة كبار ومشغولين ومسؤلين جامد مش زيك لسه يادوب في خمسة طب ومشفتش حد فيهم قال اللي بتقوله ده في يوم ولا لما شتغل قال حد ياخد شهادتي ويديني بدالها كيلو لحمة ولحد النهارده كمان بيذاكروا وغلاوتك عشان كده دكاترة ناجحين
حاول تشوف شغلانة تانية انشالله صبي مزين في محل حلاق المهم تكون حابب اللي هتشتغله كده او روح اتعالج بئى لحسن واضح ان رواسب مجتمعنا مأثرة فيكـ جامد ومش عايش ببساطة وماخدتش بالك منها الا وانت في سنة خمسة واديك قاعد تندب اهو ده كبيرك ولا فكرت تعمل حاجة ايجابية لمشكلتك ولا تقول ان هكون اد اللي اخترته بحلوه ومره
ولا يمكن عامل البوست عشان تقولنا ان الكلية صعبة ولا طب منيلة طب هو ايه مش صعب وايه مش مقرف ولا ايه الجديد اللي جبته من عندك
او اقولك احتمال عشان تقولنا انك طالب طب جايز برضو بس كنت ممكن تكتبها في البروفايل وهنشوفها ونقولك يادكتور مش هنقلك يا أوسطى
وايه درس الغش في الامتحان اللي انت عاملة محسسني اننا ضربناك على ايدك وقولنالك والنبي مانت داخل غير طب
بس فالنهاية متسكتش على نفسك ضروري تشوف حل لحسن هتبئى معقد كده يابني وده ماينفعش هتبئى دكتور عايز دكتور لو عايز دور كده على اي حد معاك فالكلية معقد زيك اسأله اعالج نفسي فين والنبي يااخ اكيد مش هيبخل عليك بالمعلومة وعادي اعمل الموضوع ده بكل فخر العلاج النفسي مش عيب والمرض النفسي مرض زيه زي الانفلونزا لازم يتعالج
تحياتي بالشفاء العاجل :)) وابئى طمني
أبو العز
متشكر على تعليقك
والثواب طبعا هو اللى مصبرنى على الليلة
نوره الخشن
أنا متشكر جدا على النصيحة الغالية
واكتشفت فيكى حاجات جديدة مكنتش أعرفها
طلعتى بتتأثرى بسرعة بكلام الغير
يعنى بدأتى فعلا تحسى بالكلام اللى قلتهولك على مدونتك
بس إنتى غلطانة
القصة اللى انتى حكتيها مش غريبة
لأن كل المصريين بيصرخوا وهما ماشيين وبيفرقعوا اكياس يخضوا الناس
ولو على الكلية هما كانوا يومين مزنوء فيهم فى المذاكرة وخلاص
هو أنا ليه ألا الطب
وعموما متشكر
العفو ابئى تعالا كل يوم بس عشان تبئى عارف انا اللي في دماغي في دماغي
بس إنتى إيه اللى عملتيه ف مدونتك ده إنتى خوفتى
كنتى فكرك أشجع من كده
أما بالنسبالى فأهلا بيكى ف أي وقت
نحن نحترم نقد الآخرين
وبجد إنتى صعبتى عليه وبلاش نقضيها شات على المدونة كفاية لحد كده
اولاً انت مين اصلاً عشان انا اخاف منك يابني دانت نفسك خايف من الكتب
ثانياً لأنك ضيف جديد عالمدونة فاللي متعرفوش جنابك ان المدونة ده القالب بتاعها الاصلي وطار والشكل اللي كان معمول ده مؤقت واسأل كل اللي يعرفوا واولهم احمد الصباغ والنايم ولعلها خير وخيخة واي كلام هيقولولك ان اصلا هى مدونة كلها شعر وخواطر بس وفاول تصميمها كان كل الناس عيزينها تفضل جاليري جميل كده مافيهوش اي شئ تاني
ولما الناس بعتولي التيجان مكنش يصح اني مش ارد من باب الذوق على الاقل وان دي ناس افتكرتني فكان المتفق عليه ان التيجان هتتحط ويعلقوا عليها وتنزل زي ما هى مسودة ومش تظهر غير ليا او اظهرها في الوقت اللي احبه عشان كده كانوا ورا بعض
أتمنى تفهم وبعدين تبئى تتكلم عشان اللي مبيبيعرفش بيقول عدس او ماتتحشرش فاللي ملكش فيه عشان من تدخل فيما لايعنيه
وياريت بعد متخلص الطب تروح اي مكان يعلمك الأتيكيت في التعامل عشان حلو للزيك
وللاسف هتخليني لأول مرة ابئى قليلة الذوق مع ضيف واقوله اتمنى عدم تكرار الزيارة لأن في فرق كبير اوي بين حرية الرأي و السخافة و تحديف الطوب وخليك فاكر ان البادي اظلم واني مادعتكش فالاصل ولا جيت عندك ولا استنيت رأيك
جامد موضوعك ياروميو...أنا طبعا عارف إنه موضوع ساخر لأنه زهبج من زهابج دفعتنا طبعا ومتفوق فى دراستك
بالمناسبة انا قرأت التعليقات اللى على الموضوع...بصراحة قوللى فيه ايه بينك وبين نورا الخشن دى؟؟؟؟
بترد عليك بطريقة هيسترية أوى
ياترى ليه؟؟؟؟
وإبقى طمنى
rmvip
ياعيني انت مسحت التعليق
لأو اضح فعلاً انك بتحترم رأي الاخرين
تصدق صعبت عليا
:0))
انا في طب برضه و يا ريتني ما كنت دخلت الكليه دي. لم اكن اتخيل نفسي دكتور و لم اكن احب الطب . كنت اعشق الرياضيات و الفيزياء جدا و كنت ساعات بجيب كتب جامعيه في الرياضيات و الفيزياء و انا في اعدادي و ثانوي و احاول اقراها و كنت اتمني ان اصبح عالم في الفيزياء النظريه و لكن قدر الله و ما شاء فعل .اخر ما كنت اتمناه ان اضيع 7 سنين من عمري في حفظ عقيم و مواد لا اميل اليها . الطب بره بيقيسو قدرات الفهم عند الطالب هنا بيقيسوا قدرات الفهم . مش انا لواحدي كده في ناس كتير جدا في طب كانو نفسهم يبقوا حاجه تانيه لكن دخلو طب. نظام الثانويه العامه و ثقافه المجتمع و نظام التعليم في الكليات هما السبب الاساسي لتخلف مصر و لو استمرينا علي المنهج ده هنذداد تخلف
Post a Comment