حوار ساخر

كل واحد مننا رمضان بيفكره بحاجه معينة
يعنى أول ميسمع رمضان قرب.. يبقى بكار قرب -
يبقى مسلسلات رمضان على وصول - يبقى تامر وشوقية الجزء التالت
غيره رمضان ممكن يفكره بصلاة الفجر - بالسحور - بصلاة التراويح
إنت ياترى رمضان بيفكرك بإيه؟ يريت متديش إجابة غير بعد قراءة البوست

فى أخر يوم من شعبان توجه السيد إبليس إلى بيت المدعو باجوجو للاتفاق على بعض الأمور الضرورية والاستعداد لخوض المعركة الرمضانية
وبعد التحية والسلام دخل إبليس فى الموضوع
إبليس:إنت عارف يا باجوجو إنى هغيب عنكم الشهر اللى جاى كله
باجوجو: ليه بس كده!!.. إنت عارف إننا منقدرش نستغنى عنك
إبليس: يا باجوجو دا قضاء ربنا ولازم نرضى بيه
باجوجو: كلك إيمان يا إبليس ياخويا
إبليس: المهم عملتلى إيه فى موضوع التراويح اللى قلتلك عليه؟
باجوجو: إطمن بعد النهارده مفيش تراويح
إنت لو عارف أنا حاطتلهم مسلسل إيه فى وقت التراويح مكنتش تقلق خالص
إبليس: عفارم عليك يا واد يا باجوجو
باجوجو: بس والله يا إبليس يا خويا عندى مشكلة مش لاقيلها حل
إبليس: إيه هى المشكلة؟.. إتكلم..قلقتنى
باجوجو: لأ إطمن.. أنا بس مش عارف نعمل إيه مع الناس الموس اللى نازلين قراية قرآن ليل ونهار
دول ناقص يحفظوه يا إبليس
إبليس: لا بقوللك إيه إنت تصرف وبأسرع وقت
إنشالله لو حصلت تصادر كل المصاحف
باجوجو: حتى لو عملنا كده .. فيه ناس حفظاه
هنعمل معاهم إيه بس؟!
إبليس: تاهت ولقناها.. أنا عايز الأغانى تنطق فى كل البيوت
البيت اللى مفهوش أغانى خدو إسمه
ومفيش حاجة إسمها حلقات ذكر
المسجد يتقفل أول بأول
باجوجو: كلامك أوامر يا أبو الأباليس ..
بس تعرف أنا عندى ليك خبر هيفرحك
إبليس: إيه الشيخ محمد حسين يعقوب كان راكب جنب السواق من غير حزام قامو دفعوه خمسين جنيه؟
باجوجو: لا حاجة أحسن
إبليس: الشيخ محمد حسان كان فى مجلس الشورى وهو بيتحرق؟
باجوجو: لا أحسن
إبليس: يبقى الشيخ أبو إسحاق كان فى عبارة وغرقت بيه؟
باجوجو: لأ برده
إبليس: ياراجل طب إتكلم.. قول
باجوجو: مين النهاردة يا عم إبليس مفيش حاجة إسمها صلاة فجر
إبليس: إيه وزارة الأوقاف قفلت المساجد؟
باجوجو:ياريت مش للدرجة
أنا هخلى الغلبان يفضل قاعد قدام التلفزيون لحد بعد الساعة واحدة
مش سايبلهم خمس دقايق فاضيين كله مليان
إبليس: طب ياباشا مهو هيصحى يتسحر ويصلى الفجر
بعد طبعامينام لخمسة الصبح
باجوجو: لا هو أنا مقولتلكش؟
إبليس: قولتلى إيه؟
باجوجو: أنا غيرت الساعة من النهاردة
الفجر بقى بيدن الساعة أربعة
وبكده من الأفضل لأى واحد يتصحر قبل ما ينام
إبليس: دا إنت طلعت شيطان يا باجوجو
باجوجو: تلميذك يا باشا
إبليس: أنا كده أقدر أمشى وأنا مطمن إنى سايب ورايا واحد زيك يا باجوجو