مسرحية باجوجو



مسرحية باجوجو كانت وما زلت أحب المسرحيات إلى قلبى

يكفى أنها المسرحية الوحيدة التى شاهدتها مرتين

كانت أولاهما منذ أربع سنوات فى ساقية الصاوى
والمرة الثانية بعدها بسنتين فى مسرح الجمهورية

وكيف لا وقد رأيت فيها عرضا مشوقا مع فكرة قيمة
تخرج منها بهدف قلما تخرج بمثله من أى عرض مسرحى

عندما جاءتنى فكرة عمل المدونة
أشار على أحد الأصدقاء وقد كان رامى شهاب الدين
أن أتخذ من باجوجو إسما لها
وذلك بعدما سمع أغنية باجوجو المعدة خصيصا لهذا العمل المسرحى الرائع
والتى تم وضعها على المدونة
وهى كلمات/أحمد شاهين
ألحان وغناء/محمد الصاوى
منذ فترة تم الإتصال بمخرج المسرحية
لأخذ رأيه فى المدونة ولأطلب منه وضع الأغنية الباجوجية على المدونة
فأشار على بأن أضع هذا البوست
حتى يعرف الناس ما هى باجوجو وممن أخذت الإسم
وقد وافقته لأن هذا من باب إعطاء الحق لأصحابه
وقد كان من المفترض منى أن أستئذنه قبل عمل المدونة
فأعتذر له وأرجو أن أكون بذلك قد وفيته حقه


وإليكم تفاصيل مسرحية باجوجو

تأليف/ رجب حسن
اعداد و اخراج/ وليد طلعت

..عرضت في
مهرجان الفنون المسرحية الـ 28 بجامعة حلوان 2004
ساقية عبد المنعم الصاوي 2004
مهرجان ساقية عبد المنعم الصاوي المسرحي الثاني 2004
المهرجان القومي الأول للمسرح 2006

تدور أحداث المسرحية حول فكرة الباجوجو وكيف أنه موجود فى كل العصور بلا استثناء

ففى البداية يظهر لنا كاتب يريد أنا يترك كتاباته
لأنه وجد الفساد قد ملأ الدنيا فهو بمجرد أن يشغل الراديو ليسمع أخبار العالم
يستفيض المزيع فى ذكر القتلى والدماء

عندما قرر هذا الكاتب أن يترك كتاباته فهو قد وجد الخيانة ملأت كل العصور.. فعن أى عصر يتكلم

جاءه أحد الممثلين كأنه الضمير وشجعه ألا يترك الكتابة
وعلمه أن التاريخ مع أنه مليئ بالباجوجو إلا أنه لا بد أن يكتب فهناك حقب زمنية بلا باجوجو

وتتوالى المشاهد لتبين لنا عصورا تاريخية متفاوتة ملأها الباجوجو
وبعد إنتهاء كل عصر يأتى الكاتب وضميره
ليبين الكاتب أن كل العصور مليئة
ويبين الضمير

أنا هناك عصور لم يتحدث عنها الكاتب خالية من الباجوجو

لن أطيل عليكم .. من أراد المزيد فيمكنه أن يشاهد المسرحية كاملة


32 comments:

شق القمر said...

طب مفيش روابط ولا حاجة نشوف المسرحية؟؟

باجوجو said...

لا الحقيقة مفيش روابط
بس إن شاء الله هسألك المخرج العرض القادم هيبقى إمتى

وأوعدك بتذكرة مجانية

بس انتى قولى يارب
تشرفت بمرورك

EMMY BABY said...

اخيرا فهمت يعنى ايه باجوجو بس ده مؤقتا اكيد هفهمه اكتر لما اشوف المسرحية

بس هشوفها فين ؟؟؟؟

ثانيا بجد اكيد هى حلوة اوى كدة انها تاثر فيك وتفضل فاكراها

ثالثا عجبنى انك استأذنت صاحب الاسم

تحياتى

ايمى

شق القمر said...

هههههههههههههه
بس انا مبحبش الوسايط
اى نعم الفرجة فى البيت عندى احلى
بس برده لازم يكون لها مرجع تانى غير الروابط :)

باجوجو said...

إيمى
أنا سعيد أوى إنك فهمتى باجوجو
ولو المسرحية متعرضتش تانى
أنا مستعد أحكيهالك مشهد مشهد
أنا ليه بركه إلا إنتى
تقبلى تحياتى

باجوجو said...

شق القمر
أنا غلبت معاكى
مش عارف أريحك إزاي
بس زى ماتحبى
تقبلى تحياتى

خالد فوده said...

ههههههههه
جميله باجوجو الاسم الغريب ده
بس الحمد لله اديني عرفت المعني
وبصرااحه شوقتني اشوف المسرحيه
تقبل مروري

باجوجو said...

خالد فودة
نورتنى
والحمد لله إنك عرفت معناها
ويارب تكون الفكرة عجبتك
تقبل تحياتى

نوسه وريمان فى هاكونا مطاطا said...

السلام عليكم

مدونه جميله وفكرتها اجمل

وشكلها مسرحيه حلوه اوى

وفكرتها كمان كويسه جدا

تقبل مرورى

Anonymous said...

ازيك يا روميو
ماشاء الله مدونتك رائعه وجميييييييله ههههههههههه مش بحسد والله.. بس اخوك لسه برده مبتدئ ربنا يكرمك وبالنسبه للمسرحيه ايه رايك تدور على القصه او المؤلف وتكتب لنا كل كام يوم فصل ياسيدى ؟؟
كل عام وانتم اللى اقرب واسالك الدعاء
حلم كبير

باجوجو said...

حسام وريمان فى هاكونا مطاطا
أشكرك على كلامك الطيب
ونورت المدونة فى أول زيارة ليك
ويارب تكون عجبتك
والمسرحية فعلا جامدة جدا
ويارب المواضيع القادمة تنال إعجابك
تقبل مرورى

باجوجو said...

محمد عبد الباسط
ياباشا المدونة جميلة علشان إنت بتحط تعليقك فيها
ولو عايز تحسد إحسد مدونتك
أي نعم هى حلم جديد بس حلم كبير
وفكرة القصة على حلقات دى فكرة رائعة
أوعدك أفكر فيها
ربنا يكرمك وكل سنة وانت طيب
تقبل تحياتى

كـــيــــــــارا said...

انا كييييييييييييييييت

بصي بقي ياعسل انا عاوزاكي تحكيلي المسرحيه حرف حرف

الله امال ايه

تشوقيني ليها وبعدين تسبيني

عااااااااااااااااااااااا

كل سنه وانتي طيبه

البوست الجاي الاقيكي قايلاها بالتفصييييييييييييييييل

سلاموز بقي

باجوجو said...

كيارا
على فكرة أنا واحد مش واحدة
ومع ذلك مفيش مانع أحكيلك المسرحية بالتفصيل
بس مش هينفع على المدونة التفصيل اللى إنتى عايزاه
ممكن فى المستقبل أختصر بعض المشاهد على المدونة
بس أنا سعيد إنها نالت إعجابك
نورتى المدونة
تقبلى تحياتى

كـــيــــــــارا said...

ممممم ليه الاحراج ده بقي انا اسفه جدا وبعتزر

ومليس دعوه لازم تحكيها عااااااااااااااا

باجوجو said...

مفيش إحراج ولا حاجة
وخلاص متزعليش أنا هحكيهالك
خلاص بقى
لسة زعلانة؟

كـــيــــــــارا said...

لا خلاص مس سحلانه ادام هتحكيها

كيكيكييكيكيكيكيكيك

Unknown said...

اية رأيك تشرفنا بالتواجد معنا يوم السبت؟ 13/9 هنتقابل فى مستشفى ابو الريش الساعه 3 عصرا للتبرع للاطفال
؟؟؟
وباقى التفاصيل عندى بالمدونة

باجوجو said...

نهر الحب
كان نفسى بجد أبقى معاكو
بس لسه فاضلى آخر إمتحان فى السنة العقيمة دى اللى مش بتخلص
دا غير إنى من محافظة الغربية
يعنى اليوم كله هيبقى ضايع
بس أوعدك لو فيه فرصة تانية بعد الإمتحان أنا معاكو
تقبلى تحياتى

Rosie said...

العلم نور برده..أخيرا عرفنا باجوجو جايه منين..
شكرا لك

باجوجو said...

Rosie
الحكاية مش محتاجة شكر
دا واجب عليه
أسعدنى مرورك

كـــيــــــــارا said...

ايوان ايوان علي الناس اللي مس بتسال خالص

ماسي ماسي انا كيت اطمن

سلاموز
:)

باجوجو said...

كيارا
إزاي بقى أنا أقدر أستغنى عنك
أنا بس كان عندى شوية إمتحانات
وخلاش خلصتهم
وهتزهقى منى بعد كدة
إيه رأيك بقى

Unknown said...

انا كنت مندهشة من الاسم
بس الوقت عرفت حقيقتة
ربنا يوفقك وتقدر تقدم اعمال هادفة وكمان تكون نجم فى مجالك بس بلا اسفاف

تحياتى
وربنا يوفقك فى امتحاناتك يارب
بالنجاح والجاتوة

باجوجو said...

نهر الحب
أشكرك على كلامك
وكويس إنك نبهتينى لموضوع الإسفاف ده
أحنا فعلا بنكره الباجوجو
بس لازم أما نتكلم عنه نتكلم بأخلاقنا
أشكرك مرة تانية
ونورتى المدونة

فتوح أبو المفاتيح said...

جميل جدا تذكرك للجميل
وارجاعك الحق لأصحابه
اللي انت اتكلمت عنه دا ثقافة غايبة عن المجتمع بتاعنا
خير
جزاك الله خيرا

باجوجو said...

أشكرك فتوح أبو المفاتيح على مرورك
وجزاك الله خيرا
وإن شاء الله متكونش آخر زيارة

محمد عبد الباسط said...

الف مبروك يا روميو عقبال التخرج تمنياتنا دوما بالنجاح الباهر والتفوق
اخوكم محمد عبد الباسط
حلم كبير

باجوجو said...

محمد عبد الباسط
ألف مبروك لينا كلنا
وان شاء الله السنة اللى جاية
نكون أفضل
ونمشى فى طريق الحلم الكبير

أسعدنى مرورك

semsema said...

الف مبرووك دكتر رامي عالنتيجة
وعقباااال التخرج باذن الله
ومدونتك عجبتني اوي
ومكنتش فاهمة باجوجو دي يعني ايه غير لما دخلت
نتمني نشوف جديدك قريبا
تحياتي

باجوجو said...

ألف مبروك لينا كلنا يا سمسمة

وإن شاء الله مواضيع باجوجو القادمة تنال إعجابك

أسعدنى مرورك

Unknown said...

انا حضرت المسرحية فى ساقية الصاوى من 11 سنة تقريبا واتمنى انى الاقى رابط لها لانها فى ذاكرتى حتى اليوم اتمنى فعلا تنزلوها على اليوتيوب والفيس حرام المسرحية دى تدفن