غمض عينك يا باجوجو

أنا قلت أبدأ بالباجوجو الكبير
وبوجهله كلمة قالها محمد فؤاد
‏(غمض عينك دقيقة ... وإنت تشوف الحقيقة)
أنا بصراحة مش عارف ليه كل الأفلام المصرية
بتلعب على الوتر الباجوجى الهايل ده
عايزين يقولولنا : والله باجوجو بيحبكم
بس يا حرام يعمل إيه فى الباجوجية اللى حواليه
أصلهم يا كبدى بيضحكوا عليه وبيخبوا عليه كل حاجة
دول كمان بيكدبوا عليه وبيقولوله إن علبة الكشرى بنص جنيه
يارب متموتنيش ألا أما آكل علبتين كشرى بجنيه
بس محدش بيعمر فيها كله لازم يموت
هو مش كله كله يعنى الباجوجو الكبير بيعمر
دا إحنا ولاد .....
ولاد باجوجو
ربنا ياخدنا كلنا فى يوم واحد
عشان الباجوجية يصحو من النوم ميلقوش حد يبججو عليه
ميلقوش حد يبججو عليه بقى يعملوا عقد عمل ويسافروا السعودية بقى
كل باجوجو يجيب خلاطين
يبيع واحد ويخلى واحد

........‏
بقول لواحد صاحبى على موضوع الوتر ده قاللى
إحنا يعنى هبل يعنى باجوجو الكبير معندوش واصلة دش علشان يشوف قناة.....
قناة باجوجو الإخبارية
قلتله أنا عن نفسى أختار أعيش تحت واحد باجوجو يضحك عليه ويستعبطنى
أحسن من العيشة مع باجوجو بينضحك عليه
وعلى رأى المثل:
اللى ملوش باجوجو فى أهله ملهوش باجوجو فى حد
واللى ملوش باجوجو بيشتريله باجوجو
منتظر مداخلاتكم علشان أعرف أى الباجوجين تختار:
الغافل المحب لأهله
أم الواعى اللى مش.......

باجوجو فى دائرة المعارف

كلمة باجوجو غالبا لا توجد فى دائرة المعارف البريطانية...
بس أنا كمان مش هديكو تعريف واضح لكلمة باجوجو...
بس يا هل ترى باجوجو دى اسم أكلة_صباح الجوع...
ولا يمكن اسم لعبة _صباح الشقاوة...
ولا بقى اسم مدينة ولا دولة ولا يمكن قارة...
ولا يمكن اسم واحد أو واحدة...
أكيييد كل الإجابات اللى فاتت دى مش صحيحة...
باجوجو زى ما علماء النفس بيقولو(أنا بس):
ممكن تتشاف ممكن تتحس ممكن تتسمع ممكن تتشم...
بس مش ممكن تتوصف
بس اللى أنا متأكد منه إن اللى هيقرا موضوعات مدونتى للآخر... هيلاقى فى يوم تعريف لكلمة باجوجو...
وممكن نعملها مسابقة واللى يجاوب عليها هدعيله:
...
...
...
ربنا ما يوريك باجوجو
و على رأى المثل :...اللى يشوف باجوجو غيره يهون عليه الباجوجو بتاعه